O PP anima aos veciños de Lugo a alegar contra a suba de impostos para o vindeiro ano

Coincidindo co día no que se abre o prazo para presentar alegacións ás ordenanzas fiscais para o vindeiro ano, que contemplan unha subida do IBI e do recibo da auga, entre outros impostos municipais, o PP “anima á cidadanía a presentar achegas para facer valer os seus dereitos” e lembra que “prazo remata o 13 de novembro”.

En rolda de prensa, a voceira do grupo municipal do Partido Popular, Elena Candia, dixo que “cunha mellor xestión municipal se evitaría o esforzo extra que se lle pide aos lucenses con esa suba de impostos”.

• Nese sentido, informou de que “hoxe comezou o prazo de 30 días naturais para presentar alegacións ás ordenanzas fiscais aprobadas por PSOE e BNG no pleno do pasado xoves, 26 de setembro, co voto en contra do Partido Popular”.

Candia lamentou que o goberno local, aínda que contou con máis ingresos pola participación nos tributos do Estado e xestionou 51 millóns de euros de remanentes nos últimos cinco anos, ao final, acabou por endebedar ao Concello e tivo que contratar un préstamo de 13,5 millóns de euros para executar investimentos.

"Dar exemplo antes de cargar os esforzos aos de sempre"

“A alcaldesa xustificou que sube os impostos para dar mellores servizos pero nin se compromete a xestionar mellor, nin aclara para que pide un esforzo de 4.5 millóns de euros aos lucenses. Tampouco explica en que van a mellorar os servizos”, dixo Candia.

Por iso, a voceira popular preguntase “se PSOE e BNG están dispostos a renunciar a gastos superfluos e a deixar de facer proxectos que non supoñen ningún valor engadido e que acaban convertíndose nunha hipoteca para as arcas municipais”.

Voto en contra da suba de catro taxas

Lembrou que o Partido Popular votou en contra da suba de catro taxas que afectan directamente á veciñanza: plusvalía, saneamento e abastecemento, sumidoiros e o Imposto de Bens Inmobles (IBI). Elena Candia dí que o goberno local “ten mecanismos para incrementar os ingresos municipais sen ter que cargar este esforzo á cidadanía.”

• Explicou que “está demostrado que se restamos a auga que se trata e se verte na rede (9.8Mm3), coa que se consume e destina a baldeos (5.1 mM m3) nos atopamos con que 4.486.790 m3 de auga se perde en fugas ou consumos ocultos. A pesar de que esa auga non chega as billas dos domicilios e empresas, a veciñanza paga igual por ela 5.182.242,45 €. Este é un claro exemplo de mala xestión xa que se paga por un servizo que non funciona correctamente”.

Con respecto ao Imposto de Bens Inmobles, lembrou que Lugo ten o segundo IBI máis caro de Galicia logo de Vigo e esixiu “claridade respecto ao posible cambio no tipo de gravame do IBI para as fincas en áreas de expansión".

“Estamos falando de terreos, que ata agora pagaban o IBI Rústico, e que poderían pasar a pagar o IBI Urbano, o que suporía unha suba significativa para os propietarios de máis de 15.000 metros cadrados de propiedades nas parroquias de Lugo”, precisou.