Os gladiadores volven a adestrarse en Lugo

Comeza en Lugo Semana Nacional do Deporte Antigo . As actividades quedarán inauguradas este xoves. Trátase dunha prosposta cultural que se desenvolverá ata o 23 de novembro, e que achegará á cidade a máis de cincuenta atletas e especialistas de toda España. Entre outras actividades, inclúe o V Adestramento Nacional de Gladiatura, con adestramentos abertos ao público para observar de preto as técnicas e prácticas que eran empregadas nos combates. 

Organizado pola Área de Xuventude e Deportes do Concello de Lugo, xunto coa asociación Lucius Spiculus Divulgación, este evento propón “unha programación diversa, con conferencias, exhibicións e competicións abertas a todos os públicos, que permitirán descubrir as orixes do deporte pero tamén achegar o patrimonio e a historia da cidade desde outra perspectiva”, explica o edil de Xuventude, Jorge Bustos.

"Este importante evento é unha cita máis que consolidada no panorama nacional que por primeira vez chega a Lugo", explicou o concelleiro, “ofrecendo unha viaxe ao pasado e achegando a riqueza do patrimonio histórico ás novas xeracións, con propostas e actividades dirixidas tanto a especialistas como ao público xeral”.

"Durante esta semana, non só podemos coñecer máis sobre a historia de Lugo, senón que este evento tamén nos brinda a oportunidade de practicar estes deportes dunha maneira rigorosa, dacordo coas súas orixes”, dixo Bustos. De feito, o concelleiro lembrou que “o traballo dos poñentes e expertos" que participarán na Semana Nacional do Deporte Antigo "foi fundamental para achegarnos a unha recreación fiel e enriquecedora, polo que a súa presenza en Lugo será unha gran oportunidade para seguir aprendendo sobre as nosas raíces”.

• Entre os poñentes, precisou, destacan Alfonso Mañas, doutor en Historia do Deporte, experto en gladiatura, investigador da Universidade de Berkeley e membro do Consello Editorial de The International Journal of the History of Sport.; Juan Tranche, editor e divulgador sobre a Antiga Roma e autor da novela Spiculus; Fernando Barriales, recreador histórico especializado en gladiatura e creador de musealizacións; e Javier Romay, fundador de Lucius Spiculus Divulgación e especialista en deportes antigos.

adestramento de gladiadores

Entre as actividades máis destacadas desta semana, inclúese o V Adestramento Nacional de Gladiatura, que en edicións anteriores acolleron cidades como Tarragona e Madrid. Os adestramentos, abertos ao público, permitirán observar de preto as técnicas e prácticas empregadas nos combates. 

Ademais, o vindeiro día 23 celebraránse os Xogos Panhelénicos no Campo Municipal de As Pedreiras, onde o público poderá experimentar como eran disciplinas deportivas da antigüidade e presenciar unha competición de nivel nacional.